04-03-2013
Shkup
APEL I AVOKATIT TË POPULLIT
Në prag të zgjedhjeve lokale, Avokati i Popullit u apelon të gjithë pjesëmarrësve në procesin zgjedhor, të mos lejojnë dhe të pengojnë çdo përpjekje për involvimin, manipulimin eventual dhe keqpërdorimin e fëmijëve për qëllime partiake-politike.
Si organ kompetent për mbrojtjen e të drejtave të fëmijëve, Avokati i Popullit i thërret prindërit, partitë politike dhe pjesëmarrësit e tjerë të mos lejojnë përfshirjen e fëmijëve në fushata, përkatësisht të mos shfrytëzohen ata në spote, bilborde, si dhe në mitingje të pjesëmarrësve në procesin zgjedhor.
Sipas Avokatit të Popullit përfshirja e fëmijëve në çfarëdo qoftë mënyre në fushata politike është në kundërshtim me Konventën për të Drejtat e Fëmijës sipas së cilës, fëmijët duhet të mbrohen nga të gjitha llojet e keqpërdorimeve dhe manipulimeve, Deklaratën për Mbrojtjen e Fëmijës nga Manipulimi dhe Keqpërdorimi Politik të Kuvendit të Republikës së Maqedonisë, Ligjin për mbrojtjen e fëmijëve, si dhe Ligjin për arsim fillor dhe të mesëm me të cilët, veç tjerash, ndalohet organizimi politik, veprimi dhe keqpërdorimi i fëmijëve.
Njëkohësisht, Avokati i Popullit apelin e tij ua drejton edhe mediave me qëllim që të mos pranojnë të transmetojnë mesazhe të paguara politike, nëse përmes tyre kryhet (keq) përdorimi i fëmijëve për qëllime politike.
AVOKATI I POPULLIT