18.02.2011
АПЕЛ НА НАРОДНИОТ ПРАВОБРАНИТЕЛ ЗА СЛУЧУВАЊАТА НА СКОПСКОТО КАЛЕ
Следејќи го последниот настан на Скопското Кале, каде дојде до судир помеѓу граѓани од двете најбројни етнички заедници во земјата, како и појавите на делби по разни основи, Народниот правобранител ја изразува својата загриженост за се почестото манифестирање нетрпеливост, особено на национална и верска основа.
Нашето општество се одликува со низа различности по многу основи и она што претставува неопходност е да се покаже волја за разбирање, прифаќање и толеранција, како суштински предуслов за соживот и благосостојба.
Загрижува што во последно време поделбите во општеството добиваат се поголеми размери и директно влијаат на целокупните состојби со човековите права, а инцидентите од ваков вид многу лесно можат да прераснат во конфликт со сериозни последици за граѓаните и општеството.
Пресметките помеѓу граѓаните што се случија и загрижувачките најави за нивно повторување, не смее да се дозволи да прераснат во уште поголеми делби и натамошно продлабочување на веќе постоечкиот јаз помеѓу различните етнички и верски заедници во општеството.
Затоа Народниот правобранител апелира до сите политички субјекти, институции, граѓанското општество и граѓаните, да се воздржат од какви било активности што создаваат нетолеранција, а особено говор на омраза и можат да предизвикаат тензии и судири помеѓу различни етнички заедници и претставници на различни верски групи.
Народниот правобранител особено апелира до младите генерации од сите етнички заедници бидејќи тие се иднината на ова општество.
НАРОДЕН ПРАВОБРАНИТЕЛ