26.03.2008
КОЛЕКТИВНОТО ИСКЛУЧУВАЊЕ Е ПРОТИВЗАКОНСКА МЕРКА
По повод информациите објавени во медиумите дека поради намалената наплата на сметките за електрична енергија ЕВН-ЕСМ во одредени населени места врши колективно исклучување со цел нередовните плаќачи да ги принуди да ги подмират нивните обврски, при што истовремено исклучува домаќинства кои ги подмириле обврските за потрошена електрична енергија, Народниот правобранител укажува на следното:
Со колективното исклучување на електричната енергија ЕВН-ЕСМ постапува спротивно од соодветната законска регулатива и неосновано ги става во позиција на солидарни должници сите жители, без оглед на тоа што дел од потрошувачите континуирано и благовремено ги подмируваат обврските за потрошена електрична енергија. Ова произлегува од неспорниот факт дека во соодветните сметки е евидентиран секој корисник поединечно, што значи дека тие исклучиво се однесуваат на односниот корисник и со истите не можат да бидат опфатени останатите корисници.
Народниот правобранител смета дека ЕВН-ЕСМ треба да бара наплата на своите побарувања, но тоа да го врши исклучиво на начин во согласност со позитивните законски прописи: Законот за енергетика, Условите за снабдување со електрична енергија и Законот за облигациони односи.
Според тоа, Народниот правобранител препорачува ЕВН-ЕСМ веднаš да прекине со противзаконската мерка колективно исклучување и да пристапи кон приклучување на сите корисници кои редовно ги подмируваат обврските.