09.03.2016
09-10.03.2016, Малта
ДЕВЕТТИ СОСТАНОК НА АСОЦИЈАЦИЈАТА НА ОМБУДСМАНИ НА МЕДИТЕРАНОТ
Народниот правобранител, г. Иџет Мемети учествуваше на деветтиот состанок на Асоцијацијата на Омбудсмани на Медитеранот насловен како „Омбудсманот-главен играч во доброто владеење“ што оваа година се одржа на 9 и 10 март на Малта.
Во фокусот на средбата беше мигрантската криза во Европа и улогата што омбудсманите и медијаторите во земјите на Медитеранот ја имаат во заштита на правата на мигрантите и бегалците. Народниот правобранител, г. Иџет Мемети имаше излагање на оваа тема, осврнувајќи се на состојбата со бегалците кои транзитираат низ Република Македонија, улогата на институцијата Народен правобранител во заштита на правата на овие лица, но и состојбата во двата транзитни центри во кои престојуваат бегалците особено во последниот период кога земјите од т.н. Балканска рута ги затворија границите. Тој побара сериозен пристап од сите актери вклучени во решавање на ова прашање со цел изнаоѓање хуман третман кон овие лица, а особено кон ранливите категории, односно децата, жените и старите лица. На оваа средба Асоцијацијата усвои Декларација со која земјите на Асоцијацијата се заложија да влијаат на сите релевантни чинители, домашни и меѓународни, државни и невладини, во почитување на стандардите и обврските кои произлегуваат од меѓународните закони за човекови права, вклучувајќи ја тука и Женевската конвенција од 1951 година, со цел заштита на човековите права на бегалците кои транзитираат низ земјите на Медитеранот и хуман третман кон нив.
Во рамките на средбата се одржа и Генералното собрание на Асоцијацијата на кое се избраа новите членови на управните органи и се примија нови земји- членки со право на глас, Монако и Косово. На Генералното собрание се договори и местото на идната средба на Асоцијацијата што во 2018 година ќе се одржи во Охрид, Република Македонија.