06.05.2011
Охрид
ГОДИШНА РАБОТНА СРЕДБА НА ВРАБОТЕНИТЕ ВО ИНСТИТУЦИЈАТА НАРОДЕН ПРАВОБРАНИТЕЛ
Во рамки на реализацијата на проектот МОСП поддржан од Мисијата на ОБСЕ во Скопје и шведската Меѓународна агенција за развој СИДА, од шести до осми мај годинава во Охрид се одржа работна средба на вработените во институцијата Народен правобранител.
На средбата стана збор за проектните активности кои во наредните 18 месеци ќе се спроведат во рамките на твининг проектот финансиран од ИПА претпристапните фондови на Европската Унија, како и за активностите кои ќе се одржат во рамките на мрежата на омбудсманите за деца CRONSEE чиј домаќин годинава е македонскиот омбудсман.
Исто така беше претставена и новата организациска структура на Народниот правобранител, начинот на работа на трите новоформирани организациски единици – Одделението за превенција на тортура и друг вид свирепо, нечовечко или понижувачко постапување или казнување т.н. национален превентивен механизам, Одделението за заштита на детето и на лицата со посебни потреби и Одделението за заштита од дискриминација и за соодветна и правична застапеност.
Вообичаено беа разменети искуства од досегашната работа, односно постапувањето по претставките, а се разговараше и за надградбата на постоечката апликација со воведување во системот на трите нови одделенија.