30.05.2012
Скопје
ПРЕЗЕНТИРАН ГОДИШНИОТ ИЗВЕШТАЈ НА НАЦИОНАЛНИОТ ПРЕВЕНТИВЕН МЕХАНИЗАМ
„Во местата на лишување од слобода делумно се исполнети меѓународните и домашните стандарди, нотирано е задржување во полициска станица на малолетни лица подолго од законски утврдениот минимум,утврдени се и состојби кои загрижуваат во казнено поправните установи, а како најголем проблем во истите е нотирана здравствената заштита за која постои недоволна кадровска екипираност„
Ова меѓудругото го рече народниот правобранител г. Иџет Мемети презентирајќи го првиот
Годишен извештај на Одделението за превенција на тортура и другo сурово, нечовечно или понижувачко постапување или казнување-Национален превентивен механизам (НПМ) за 2011 година.
Тој исто така рече дека НПМ редовно ги испитува условите на местата како и постапувањата со лицата лишени од слобода и дава препораки со цел превенција од тортура и други видови на нечовечно постапување.
“Превенцијата има значајна улога во борбата против тортурата и другите форми на сурово и нечовечно постапување и казнување. Само преку заштита на правата на граѓаните кои биле жртви на тортура или нечовечно постапување, без навремено укажување на можните ризици, недостатоци и легислативни празнини, нема да се оствари целта која треба да се постигне” рече Мемети.
Инаку, овој извештај ќе биде доставен до сите институции и установи каде постои лишување од слобода или ограничување во слободата на движење, а согласно Факултативниот протокол истиот ќе биде пратен и до Поткомитетот за спречување на тортура при ОН.