26-10-2012
Shkup
DEBAT NË TEMË: “DHUNA MBI FËMIJËT DHE MIDIS TYRE”
“Në Republikën e Maqedonisë ekziston kornizë ligjore për mbrojtjen e fëmijëve nga dhuna, si në familje ashtu edhe në shkolla dhe institucione për përkujdesje, por nevojitet aktivitet i mëtutjeshëm për monitorimin e gjendjeve, si dhe veprim parandalues me qëllim të parandalimit të incidenteve midis fëmijëve në dhe jashtë shkollave. Gjithashtu, nevojitet të gjitha institucionet, por edhe prindërit vazhdimisht të punojnë në fushën e edukimit të fëmijëve me qëllim të rritjes së tolerancës, përkatësisht respektimit të dallimeve”.
Këto janë një pjesë nga rekomandimet të cilat dolën nga Tryeza e rrumbullakët në të cilën u debatua në temën: “Dhuna mbi fëmijët dhe midis tyre” e cila, në kuadër të Projektit “Tuining” për mbështetjen e Ombudsmanit të Maqedonisë, financuar nga fondet para-aderuese të Bashkimit Evropian – IPA, në të cilin partnerë janë: Ombudsmani Nacional i Spanjës dhe Mediatori i Francës, u mbajt në “Info Qendrën” e BE-së në Shkup.
“Dhuna është problem serioz dhe me aplikimin e saj rrezikohet zhvillimi i fëmijëve, shëndeti i tyre dhe mirëqenia, cenohen të drejtat themelore të fëmijës-vihet në pikëpyetje jeta e fëmijës.” – tha në fjalën e tij Avokati i Popullit, z. Ixhet Memeti.
Sipas Ombudsmanit, arsimi duhet të orientohet drejt zhvillimit të fëmijëve dhe respektimit të të drejtave të tyre, si dhe në përgatitjen e fëmijëve për jetë të përgjegjshme në shoqëri të lirë, në frymën e mirëkuptimit, paqes, tolerancës, barazisë dhe miqësisë.
Për “Pikëpamjet e Avokatit të Popullit për dhunën mbi fëmijët dhe midis tyre”, foli znj. Vaska Bajramovska Mustafa, këshilltare shtetërore në Zyrën e Avokatit të Popullit, ndërsa përvojat nga puna e Ombudsmanit të Spanjës dhe Mediatorit të Francës, i shpalosën: znj. Marija Teresa Salses dhe znj. Zheraldin Lisondr.
Në Tryezën e rrumbullakët morën pjesë përfaqësues nga: Ministria për Punë të Brendshme dhe përfaqësues nga institucione tjera për përkujdesje të fëmijëve.